【明報專訊】母親節快到，大家諗好點同媽媽慶祝未？有生命攝影師噚日就義務幫基層家庭影相，提早送禮物畀基層媽媽。

Emily同大家一樣都未聽過生命攝影，於是就請教咗生命攝影師馬嘉健。佢話，生命攝影同一般攝影相比，唔太講求專業器材、燈光同攝影技巧，而係注重人與人之間嘅日常互動，捕捉人最真摯嘅反應。馬嘉健話，仔女長大後往往會不經意將父母擺埋一邊，而透過生命攝影可以重新連結家庭關係。

明德社區主任陳志豪噚日就邀請到馬嘉健為區內嘅基層家庭影相。陳志豪話，基層市民好少有機會請專業人士影全家福，趁住母親節就到，希望市民可以體會生命攝影，留個美好回憶。李太一家影完相都好開心，佢話小朋友大得快，希望把握今次機會影多啲靚相，老咗就可以睇番。李小朋友就話，平時唔會錫爸爸，但影相時就錫咗一啖，覺得同爸爸嘅關係更上一層樓呀。

https://news.mingpao.com/pns/dailynews/web_tc/article/20180507/s00002/1525629630082